Në Fakultetin e Filologjisë të Universitetit “Ukshin Hoti” në Prizren u mbajt sot takimi koordinues me bashkëpunëtorët e angazhuar për vitin akademik 2025/2026.

Takimi, i udhëhequr nga Prof. Asoc. Dr. Vjollca Dibra, Dekane e Fakultetit, kishte për qëllim harmonizimin e proceseve akademike dhe administrative në fillim të vitit të ri akademik.

Në takim morën pjesë edhe Prodekani Prof. Ass. Dr. Fikret Ramadani, kryetari i Komisionit të Cilësisë, Prof. Dr. Sejdi Sejdiu, shefja e Programit të Gjuhës Angleze, Prof. Ass. Dr. Rrezarta Ramadani, shefi i Programit të Gjuhës Gjermane, Prof. Ass. Dr. Ilir Krusha, si dhe sekretarja e Fakultetit, znj. Anzotika Hajdari.

Qëllimi i takimit ishte:

• harmonizimi i orareve dhe ngarkesës mësimore;
• dakordimi për formatin e syllabuseve dhe politikat e vlerësimit;
• shqyrtimi i procedurave administrative (kontratat, evidencat e mbajtjes së ligjëratave/ushtrimeve, afatet raportuese);
• përmirësimi i komunikimit me studentët dhe përdorimi i kanaleve zyrtare të informimit.

Po ashtu, bashkëpunëtorëve të angazhuar iu shpërndanë dokumentet themelore të institucionit:

• Kodi i Etikës
• Rregullorja për Procedurat dhe Masat Disiplinore për Personelin Akademik
• Rregullorja për Komunikime në Universitet
• Rregullorja për Parandalimin dhe Mbrojtjen nga Ngacmimet Seksuale dhe Ngacmimet në Universitet
• Rregullorja për Sigurimin e Cilësisë

Dekanja Dibra theksoi rëndësinë e zbatimit të këtyre dokumenteve në përditshmërinë akademike, duke theksuar se respektimi i etikës, përgjegjësisë profesionale dhe transparencës është themel i kulturës institucionale në Universitetin “Ukshin Hoti” – Prizren.